21.08.2018

Operohet Majlinda Kelmendi, rikthehet në tetor

9 Gusht 2018

Majlinda Kelmendi i është nënshtruar me sukses ndërhyrjes kirurgjikale në shpinë, duke hedhur pas krahëve një problem të hershëm shëndetësor. Kampionia kosovare e sportit të Xhudos tashmë duhet të kalojë fazën riaftësuese dhe sipas të gjitha gjasave do të jetë gati për të nisur stërvitjen në muajin tetor.

Drejtori sportiv i Federatës së Xhudistëve në Kosovë, Driton Kuka, ka siguruar se Kelmendi do të rikuperohet në kohë për të marrë pjesët në normat kualifikuese për Lojërat Olimpike të vitit 2020, të cilat do të mbahen në Japoni.

“Majlinda e ka kaluar me sukses operacionin në shpinë. Nuk është asgjë serioze dhe tani ajo është mirë. Operacioni është bërë tani që të ketë kohë të rikuperohet për normat e Lojërave Olimpike. Presim të shërohet ne tetor”.

Kuka e ka falënderuar Ministrinë e Shëndetësisë për trajtimin shëndetësor të Majlinda Kelmendit. Ai theksoi më tej se janë duke biseduar për të arritur një marrëveshje sipas së cilës sportistët kosovarë do të përkraheshin më shumë prej Ministrisë së Shëndetësisë.