21.10.2018

Dua Lipa përmend Era Istrefin, Rita Orën e Majlinda Kelmendin: Kosova ka shumë talentë!

8 Gusht 2018

Këngëtarja kosovare me famë botërore, Dua Lipa ka arritur sot në Kosovë.

Ajo do të perfomojë në Prishtinë të premtën (10 gusht), në kuadër të festivalit “Sunny Hill”, i cili mbahet për tri ditë radhazi, shkruan lajmi.net.

Pas arritjes, këngëtarja i është drejtuar medieve në një konferencë për medie, ku tregoi emocionet e të qenit e pranishme në vendlindje, dy vite pas koncertit të fundit që mbajti këtu.

“Faleminderit shumë, po më vjen shumë mirë që jam këtu sonte, dhe po e bëjmë një festival për të cilin kemi folur shumë gjatë për ta bërë.”, ka thënë ajo.

Dua ka thënë se pret që vitet e ardhshme në këtë festival t’i sheh edhe Rita Orën, Bebe Rexhën dhe Era Istrefin.

E pyetur se cili është mesazhi që dëshiron ta dërgojë përmes këtij koncerti që e mban në “Sunny Hill” ajo shtoi “Kur më pyesin se nga jam dhe u përgjigjem nga Prishtina, Kosova, më pyesin se si është me qenë nga ai vend dhe pyetja tjetër ku gjendet. Këto reagime nuk është se i mirëpres, dua të dëgjoj duke thënë e njoh sepse Rita Ora vjen nga Kosova, Majlinda Kelmendi vjen nga Kosova. Kemi qejf që me këtë festival me pa që ka shumë talenta nga Kosova dhe shumë arsye me vizitu Kosovën”.

Në konferencë ishte i pranishëm edhe ambasadori i Britanisë në Kosovë, Ruairi O’Connell, babai i Duas, Dukagjin Lipa dhe kryetari i Prishtinës, Shpend Ahmeti.

Kujtojmë që përveç Dua Lipës në “Sunny Hill” do të perfomojë edhe Action Bronson dhe DJ i famshëm, Martin Garrix./Lajmi.net/