21.10.2018

Sekretari i Vuçiqit: Presidenti ynë po tenton që t’i evitojë luftërat

10 Gusht 2018

Sekretari i Përgjithshëm i kryetarit të Serbisë Nikola Selakoviq, ka deklaruar sot se çështja e Kosovës është problemi më i vështirë dhe më i rëndësishëm me zgjidhjen e të cilit Serbi nuk guxon të presë më sado që, ka thënë ai, shanset për zgjidhjen e tij, janë vetëm 5 për qind.

Selakoviq, duke folur për RTS–në, ka theksuar se kryetari i Serbisë Aleksandar Vuçiq përpiqet për zgjidhjen me të cilën në të ardhmen do të evitoheshin luftërat.

Duke përkujtuar ndarjen si mundësi e zgjidhjes, ai ka thënë se për ndarje ka folur edhe Dobriza Qosiq dhe se kjo, sipas tij, dëshmon se sa i kahershëm, serioz dhe i komplikuar është ky problem të cilin Serbia s’e k zgjidhur edhe kur ka qenë më e fortë.

Ai ka shtuar se nuk është hera e parë që Vuçiqi flet për kufizim ndërsa, sipas tij, “krahinën jugore serbe” gjysma e botës e shikon ndryshe nga gjysma tjetër.

“Shanset janë që 95 për qind të mos ketë zgjidhje, ndërsa në 5 përqindëshin e mbetur për zgjidhje Vuçiq del me gatishmërinë që zgjidhja të arrihet”, tha Selakoviq.

Duke komentuar reagimin disa vendeve perëndimore që mendojnë se ndarja e Kosovës mund të shkaktojmë problem, Selakoviqi thotë se “problemi është se Vuçiq s’e njeh pavarësinë e Kosovës në kufijtë që i imponohen”.

Qëndrimin që thotë se duhet pritur edhe më për zgjidhjen e këtij problemi, Selakoviq ka thënë se duke pritur për më vonë zgjidhjen, do të rrezikohet ekonomia e Serbisë dhe se ka ikur periudha kur koha kishte punuar për Serbinë.